CCCXXXIV.

1427, Februar 15. Heinrichau.

Nicolaus von Brieg, Abt zu Heinrichau, vereinigt die Kirche von Baitzen mit dem Stifte Kamenz.

In Christi nomine amen. Pridem sanctissimus in christo pater et dominus noster, dominus Martinus, divina providentia papa quintus, incorporationem et unionem ecclesie parrochialis in Byczano Wratislaviensis diocesis cum omnibus iuribus et pertinentiis suis pro monasterio in Kamencz Cisterciensis ordinis eiusdem Wratislaviensis diocesis faciendas nobis Nicolao de Brega, miseratione divina abbati monasterii in Heynrichaw predicti Cisterciensis ordinis dicte Wratislaviensis diocesis sine proprii nominis expressione per sue sanctitatis litteras eius vera bulla plumbea cum cordula cannapi more Romane curie impendente bullatas, salvas, sanas et integras omnique prorsus vitio et suspicione carentes duxit committendas per omnia sub hac forma: - No. CCCXXXI. - Quibusquidem apostolicis litteris per scientificum virum magistrum Petrum Wartinberg advocatum causarum consistorii Wratislaviensis sindicum et procuratorem verum et legittimum venerabilis et religiosorum virorum, domini Cristofori abbatis totiusque conventus monasterii in Kamencz Cisterciensis ordinis Wratislaviensis diocesis, principalium in prescriptis litteris apostolicis principialiter nominatorum ad hoc legittime constitutum, prout de huiusmodi sue procurationis mandato nobis constabat atque constat legittimis documentis nobis presentatis et per nos cum ea, qua decuit, reverentia receptis, fuimus per eundem magistrum Petrum Wartinberg sindicum et procuratorem nomine, quo supra, procuratorio cum debita iuris instantia requisiti, quatenus ad executionem prescriptarum litterarum apostolicarum iuxta ipsarum continentiam atque formam procedere curaremus. Nos igitur Nicolaus de Brega, abbas, executor et commissarius prefatus, attenta earundem litterarum apostolicarum forma, volentes mandatum apostolicum huiusmodi nobis in hac parte a sede apostolica directum reverenter exequi, ut tenemur, vigore et auctoritate supra scriptarum litterarum apostolicarum, reverendum in Christo patrem et dominum, dominum Conradum, episcopum Wratislaviensis et discretum virum, dominum Paulum Hotczinplocz, plebanum sive rectorem dicte ecclesie parrochialis in Byczano, omnesque alios et singulos, sua communiter vel divisim interesse putantes, ad instantiam predictorum domini abbatis et conventus in Kamencz ad dicendum et excipiendum contra predictas litteras apostolicas, quidquid contra easdem dicere seu excipere vellent seu possent verbo vel in scriptis, et nichilominus ad videndum et audiendum per nos predictam ecclesiam parrochialem in Byczano cum omnibus iuribus et pertinentiis suis pretacto monasterio in Kamencz auctoritate apostolica nobis in hac parte commissa imperpetuum incorporare, unire et annectere iuxta predictarum litterarum apostolicarum continentiam atque formam, coram nobis per nostras citatorias litteras debite iuxta morem et consuetudinem civitatis et diocesis Wratislaviensis executas ad certos diem, horam et locum competentes fecimus legitime evocari; in quo quidem termino prefatus magister Petrus Wartinberg sindicus et procurator, et nomine, quo supra procuratorio, coram nobis comparuit et dictorum dominorum Conradi episcopi et Pauli Hotczinplocz ac aliorum citatorum non comparentium nichilque contra prescriptas litteras apostolicas dicere seu excipere curantium contumaces accusavit ipsosque et eorum quemlibet, quo ad actum huiusmodi, quem terminus ipse requirebat, contumaces reputari et in eorum contumaciam in huiusmodi executionis negotio ad ulteriora procedi cum debita iuris instantia petivit. Et tunc nos Nicolaus abbas executor et commissarius prefatus predictos citatos et non comparentes, quo ad actum huiusmodi, quem terminus ipse requirebat, exigente ipsorum contumacia, et iustitia suadente pronuncciavimus et reputavimus, prout erat, merito contumaces et in eorum contumaciam in huiusmodi executionis negotio nobis, ut premittitur, commisso, nos processimus et decrevimus fore et esse procedendum. Deinde vero memoratus magister Petrus Wartinberg sindicus et procurator, quo supra, sindicatus et procuratorio nomine in eodem termino nonnullos positiones et articulos cum summaria petitione sub annexa coram nobis iudicialiter obtulit et produxit per omnia sub hac forma: Ad probandum - No. CCCXXXIII. - supportando. Nonnullis quoque testibus fidedignis super huiusmodi positionibus et articulis et ipsorum contentis ad informandum animum nostrum pro parte predictorum abbatis et conventus in Kamencz inductis ac ipsis in contumaciam partis adverse ad hoc legittime evocate per nos in forma iuris solita et consueta receptis, iuratis et examinatis, ipsorumque dictis et attestationibus in scriptis fideliter redactis, visis quoque huiusmodi testium depositionibus ac aliis actis coram nobis in huiusmodi executionis negotio actitatis, ipsisque per nos rite recensitis ac equa iustitie lance discussis, sepe dictoque magistro Petro Wartinberg nomine, quo supra, procuratorio, die, hora et loco infra scriptis coram nobis comparente et sententiam in huiusmodi executionis negotio per nos ferri petente: Nos Nicolaus de Brega, abbas, executor et commissarius prefatus, per ea, que vidimus et cognoscimus et nunc cognovimus et videmus, nostram in presenti executionis negotio sententiam in contumaciam dictorum dominorum Conradi episcopi et Pauli Hotczinplocz aliorumque omnium et singulorum sua communiter vel divisim interesse putantium ad hoc legittime citatorum protulimus et promulgavimus, ferimus et promulgamus ipsorum citatorum et cuiuslibet eorum contumacia non obstante per omnia sub his verbis: Christi nomine invocato - No. CCCXXXIII. - et decretum. In quorum omnium et singulorum fidem et testimonium premissorum presentes litteras sive presens publicum instrumentum huiusmodi nostram sententiam in se continentes seu continens per Mathiam de Jelcz, notarium publicum huiusmodi executionis negotii coram nobis scribam infrascriptum scribi et publicari mandavimus nostrique sigilli appensione fecimus communiri. Lecta, lata et in scriptis pronuncciata est hec nostra sententia per nos Nicolaum abbatem, executorem et commissarium prefatum in monasterio nostro Heynrichaw supradicto sub anno nativitatis domini millosimo quadringentesimo vicesimo septimo, indictione quinta Saturni, die quinta decima mensis Februarii, hora tertiarum vel quasi, pontificatus sanctissimi in Christo patres et domini nostri, domini Martini divina providentia pape quinti supradicti anno decimo; presentibus ibidem honorabili, religiosis et valido viris: domino Wenceslao de Hugewicz canonico ecclesie collegiate sancte Crucis Wratisl., Nicolao de Monstirberg magistro coquine et Dominico de Frankinstein fratribus professis monasterii nostri sepefati ac Jodoco Wynczk armigero Wratislaviensis diocesis testibus ad premissa vocatis specialiter et rogatis.
Signum notarii.
Et ego Mathias quondam Johannis Clarca de Jelcz, Wratisl. diocesis publicus apostolica et imperiali auctoritatibus notarius et coram supradicto venerabili patre domino Nicolao de Brega abbate, executore et commissario huiusmodi executionis negotii scriba, quia premissis omnibus et singulis, dum sic, ut premittitur, per eundem dominum Nicolaum abbatem et commissarium et coram eo successive fierent et agerentur, unacum prenominatis testibus presens fui eaque sic fieri vidi et audivi, ideoque presens publicum instrumentum huiusmodi sententiam in se continens de mandato dicti domini Nicolai abbatis executoris et commissarii exinde confeci et in hanc publicam formam redegi, signoque, quo auctoritate apostolica utor et nomine meis solitis et consuetis unacum appensione sigilli memorati domini Nicolai abbatis executoris et commissarii consignavi rogatus et requisitus in fidem et testimonium omnium premissorum.

Or. Perg. An Schnur von gedrehten grünseidnen Fäden hängt das guterhaltene S. des Abtes von Heinrichau.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.